Biznaga, Caamaño&Ameixeiras, Guadalupe Prata, Susana Seivane e Santero e os Raparigos son algunhas das máis de vinte actuacións musicais que acollerá o Festival de Cans, que se celebrará entre o 20 e o 24 de maio.
Así, o venres 23 de maio Biznaga subirase ao espazoda Leira do Río e o sábado 24 de maio será a quenda para A Banda da Loba, Santero e Los Muchachos e Serial Killerz. O Torreiro, lugar icónico na aldea, onde se colocan as estrelas dos visitantes ilustres, volverá ser un espazo para actuacións musicais máis próximas. Alí actuará o venres, ás 20.00 horas, Caamaño&Ameixeiras, que dará o concerto de benvida a Cans.
Polo Torreiro pasarán tamén o sábado 24 na sesión vermú Abril e o grupo de blues Guadalupe Prata. Ademais, no espazo O Invernadoiro Rei Zentolo, que combina música e proxeccións audiovisuais, e que ten un aforamento de 100 persoas por actuación, terá lugar o sábado a performance poética de Lúa Mosqueteira.
Tamén se vivirá o regreso da gaiteira Susana Seivane despois dun ano afastada dos escenarios e estrearase o documental ‘Son Seivane’, dirixido por Xosé Antón Bocixa. O aforamento para as actuacións de O Invernadoiro é de 100 persoas e as entradas estarán á venda por 7 euros, aínda que o Festival ofrece 30 bonos por 10 euros para asistir a ambos os espectáculos. Da oferta promocional de 200 packs de lanzamento que o certame anunciou a semana pasada, tan só quedan 50 á venda.
