A cantante Vanesa Martín subirase ao escenario do auditorio de Castrelos, en Vigo, o próximo 31 de xullo, dentro da programación dos concertos de verán na cidade, segundo avanzou este venres o alcalde olívico, Abel Caballero. Vanesa Martín é unha das artistas máis recoñecidas no actual panorama musical español, e as súas xiras levárona por países como Porto Rico, México, Costa Rica, Ecuador, Perú, Chile, Arxentina ou EE.UU.
Ao longo da súa carreira foi recoñecida con varios premios, como a Medalla de Andalucía (2020), o Premio Ondas á Mellor Comunicación Musical polo seu labor de visibilidade do colectivo LGTBI (2019), o Premio Odeón á “Mellor Artista Feminina” (2020) ou o “Mellor Videoclip” nos 40 Music Awards (2019). A actuación da cantante e compositora, que tamén participou nos programas de televisión La Voz e La Voz Kids, é a segunda anunciada para este verán en Castrelos, onde tamén se representará a ópera A Traviata, o 1 de agosto.
