A delegación territorial da Xunta en Vigo celebrará este martes unha reunión aberta á cidadanía para “enriquecer” o plan de usos do Teatro Fraga, co obxectivo de coñecer as propostas e suxestións dos vigueses e de deseñar este documento. Así o sinalou o presidente do Goberno galego, Alfonso Rueda, tras a reunión do Consello da Xunta deste luns, no que se avaliou o informe da Consellería de Cultura, Lingua e Xuventude que inclúe os seguintes pasos a seguir para a apertura do Teatro Fraga.
Tras a súa compra este pasado verán por máis de 9,3 millóns de euros, pagados nun 51 % pola Xunta e un 49 % pola Deputación de Pontevedra, agora é o momento da súa rehabilitación e de dotalo dun plan de usos para a súa reapertura ao público. Por ese motivo, segundo dixo Rueda, ambas as administracións entenden que a sociedade ten que xogar un papel “fundamental” no deseño dos seus futuros usos, polo que se puxo en marcha a campaña ‘O mellor espazo busca o mellor contido’, coa que se realizarán encontros con veciños para coñecer as súas propostas e abriuse un correo electrónico para suxestións.
A primeira destas reunións será este mércores, mentres que por correo xa se recibiron máis de 200 propostas, tras abrirse o pasado agosto. Despois de colleitar as suxestións para enriquecer o plan de usos do Teatro, prevese que o proxecto quede redactado este mesmo ano, mentres que se licitarán as obras en 2025, co obxectivo de que estean acabadas a finais de 2026. Rueda puxo en valor a necesidade de coñecer que clase de espectáculos e eventos albergará o teatro para así redactar o proxecto acorde as súas necesidades.
