O auditorio municipal de Castrelos en Vigo recuperará este ano o xénero lírico musical en gran formato, coa representación da ópera Rigoletto, de Giuseppe Verdi, o próximo 9 de agosto, segundo avanzou o alcalde da cidade, Abel Caballero. O rexedor explicou, en declaracións remitidas aos medios, que este verán a programación incorporará esta ópera como novidade, á vez que lembrou que “hai moitos anos, máis dun cuarto de século”, o auditorio de Castrelos albergou representacións de zarzuela.

Caballero avanzou que o espectáculo do 9 de agosto, interpretado por “artistas internacionais”, farase sen intervalo, cunha duración dunhas 2 horas, e que haberá 2.500 cadeiras. A ópera será “gratuíta, como todos os concertos de Castrelos”. Con este novo anuncio, son xa 8 as actuacións confirmadas para a programación de concertos de verán deste auditorio municipal: Dani Fernández (13 de xullo), Coral Casabranca (20 de xullo), Luís Fonsi (23 de xullo), Sen Senra (25 de xullo), Luz Casal (2 de agosto), UB40 (7 de agosto), Víctor Manuel (14 de agosto) e Melendi (17 de agosto).