O Grupo Etnográfico A Buxaina de Coruxo celebrará, o próximo luns 24 de xullo, o seu Festival Folclórico Internacional no campo do Vao. O acto comezará ás 21:30 horas mais a apertura de portas das instalacións do Coruxo F.C. será ás 21:00.

E que é este festival? Pois é un acto que se celebra todos os anos en colaboración co Centro Recreativo Artístico e Cultural de Coruxo (CRACC) e que ten un obxectivo principal claro: dar a coñecer as expresións culturais doutros lugares do mundo. Así, pretenden que esta diversidade contribúa a fortalecer a cohesión social por medio das músicas, bailes e traxes típicos dos países que pasaran polo escenario.

O Folclórico Internacional de Coruxo, popularmente coñecido como FIC, é un festival creado fai moito tempo, remóntase ata 1990, ademais, converténdose así nun festival pioneiro en Galicia. Mostra disto son as elevadas cifras de asistencia nas edicións desta última década que contan cunha media de preto de 2.000 espectadores.

Este ano, os que acudan ao festivla poderán presenciar a grupos chegados de países como Alemaña, no caso de Frormern Swabian, ou de Serbia, como Akademsko Drustvo Novi Beograd, ademais lugares como Asturias tamén terán representación, neste caso da man do grupo Folklórico Trebeyu e, finalmente, poderase ver ao grupo anfitrión, o grupo Etnográfico A Buxaina.

Celebrarán tamén un serán o sábado 22 de xullo, a partir das 20:30, no torreiro da capela do Vao no que haberá un obradoiro aberto ao público de baile asturiano a cargo do Grupo Folklórico Trebeyu e a actuación do Cé Orquestra Pantasma.