O cadro de persoal de IKF, compañía dedicada á fabricación de materiais refractarios con sede na Guarda, iniciou hoxe unha folga indefinida despois de que a dirección confirmase que non renuncia a prolongar a dobre escala salarial e que actualizará os soldos en base ao convenio estatal, unha circunstancia que, segundo apunta a CIG, vulneraría o pacto de empresa.
A sección da Confederación dedicada á construción denuncia así a “deixadez de función” tanto da Xunta como da autoridade laboral tras 35 días de paros na empresa. De acordo coa versión do sindicato, estas “continúan sen obrigar a IKF -que rexeita a mediación- a sentarse para solucionar o conflito laboral”.
Segundo as mesmas fontes, a decisión de comezar a folga indefinida adoptouse o pasado luns despois de que o director de recursos humanos no Estado español da transnacional francesa propietaria de IKF lles trasladase en asemblea aos traballadores que non dan marcha atrás nas súas pretensións de “precarizar” as condicións laborais. En consecuencia, ás 6:00 de hoxe iniciábase un paro indefinido que foi secundado -como en xornadas anteriores- por 53 dos 55 empregados/as de produción. A CIG fai fincapé que entre as dúas persoas que non se suman á folga se atopa o delegado de CCOO no comité de empresa.
Dende a CIG-Construción critican que a empresa estea a rexeitar a mediación para poñer fin ao conflito, ao tempo que denuncian que nin a Xunta nin a autoridade laboral exerzan as súas competencias e a obriguen a sentarse. De igual xeito, censuran o comportamento dos medios de comunicación públicos como a TVG, que “oculta a loita dos traballadores/as a pesar do importante peso que a empresa ten na comarca e o xusto das súas reivindicacións”.
