A sección quinta da Audiencia Provincial de Pontevedra, con sede en Vigo, suspendeu este mércores o xuízo contra unha viguesa acusada de tenencia ilícita de armas e posesión de diñeiro falsificado debido á folga de letrados convocada para este mércores e xoves.
Segundo o escrito do Ministerio Fiscal, o caso remóntase a marzo de 2020, cando un xulgado acordou a entrada e rexistro no domicilio da muller, que entón tiña 36 anos, como consecuencia doutro procedemento xudicial.
Ademais doutros efectos incautados no marco da outra causa, os axentes localizaron na súa casa un revolver da marca Mayer Sohen, recamarado para albergar cartuchos de 9mm e que funcionaba correctamente. Esta arma está, desde abril de 2018, “conceptuada como prohibida pola normativa actual“, lembra o Ministerio Público. Así mesmo, tamén se localizaron 150 billetes falsos, 89 deles de 20 euros e 61 de 10 euros. Fiscalía pide para a acusada cinco anos de prisión por tenencia de moeda falsa, e outros dous anos de cárcere por tenencia ilícita de armas.
