O Grupo Ecoloxista ADENCO acaba de recibir notificación da proposta de sanción da Confederación Hidrográfica Miño-Sil ao concello de Ponteareas polos verquidos da depuradora ao espazo protexido río Tea, denunciados no seu momento pola entidade ecoloxista do Condado e que supuxeron a apertura dun expediente sancionador ao concello.
Na resolución, a Confederación constata a realización de verquidos ao cauce do Tea desde a depuradora da Moscadeira superando os valores límite de concentración de verquido e causando danos ao dominico público hidráulico.
Por estas actuacións, propón unha multa ao concello de Ponteareas de 22.900 euros
polos verquidos e de 3.435 euros por danos no dominio público hidráulico, rexeitando todas as alegacións realizadas polo concello.
O Organismo de conca sinala que existen circunstancias agravantes no expediente sancionador, concretamente a reiteración na conduta infractora, xa que o concello de Ponteareas ten sido sancionado por infraccións similares e a afección a un espazo protexido incluído na Rede Natura, a Zona de Especial Conservación Río Tea.
Esta sanción ao concello de Ponteareas súmase a outras vinculadas co río Tea que se teñen imposto nos últimos anos á entidade municipal. Desde ADENCO lémbrase que as multas, que xa ascenden a ducias de miles de euros, págaas toda a veciñanza e son froito da mala praxe municipal.
Nese senso, como leva facendo desde fai anos, o Grupo Ecoloxista esixe ás autoridades competentes que se solucionen dunha vez estes vertidos da depuradora ao río Tea e se depuren responsabilidades. Desde o Grupo Ecoloxista agárdase que non se volten repetir feitos como os que motivaron a proposta da sanción por parte da Confederación.
