O Consorcio Zona Franca de Vigo analizou este xoves con axentes sociais e económicos da área da cidade olívica sectores como o turismo, a industrialización, as infraestruturas, así como o reto demográfico no quinto e último workshop do Plan Estratéxico da provincia que busca identificar futuras liñas de traballo.
Na mesa de traballo, que tivo lugar en Baiona, participaron, ademais do delegado de Zona Franca de Vigo, David Regades; representantes da Asociación Nacional de Fabricantes de Conservas de Peixes (Anfaco-Cecopesca); a Asociación de Asociación de Comerciantes e Empresarios de Baiona; o alcalde de Baiona, Carlos Gómez; o alcalde de Gondomar, Francisco Ferreira; o alcalde de Nigrán, Juan González; a alcaldesa de Salceda de Caselas, Verónica Tourón, e a alcaldesa de Moaña, Leticia Santos.
Nela, Regades destacou que “estas mesas de traballo foron de moita utilidade para coñecer as necesidades de cada área e para converter o Plan Estratéxico da provincia nun dos alicerces para o crecemento económico da rexión”.
Neste sentido quixo agradecer “a boa disposición de todos os axentes sociais e económicos, que empregaron o seu tempo para trasladar a súa visión co obxectivo de que os seus territorios avancen”.
Segundo sinalou Zona Franca de Vigo, as mesas de traballo que está a pór en marcha o Consorcio foron deseñadas para “identificar liñas de traballo e proxectos que dean resposta aos retos demográficos, económicos e de desenvolvemento sustentable aos que se enfronta a provincia”. Ao longo das próximas semanas levará a cabo a última das reunións que Zona Franca ten previsto celebrar con axentes sociais e económicos da área de Vigo.
