O parque de Castrelos de Vigo acollerá o vindeiro domingo, día 9 de outubro, a 39ª Marcha Solidaria Aspanaex, en apoio á Asociación en favor das persoas con Discapacidade Intelectual da provincia de Pontevedra.
Así o anunciaron este luns en rolda de prensa as persoas organizadoras, que explicaron que será a partir das 09,30 horas cando o recinto reciba ás persoas que se queiran inscribir. Ás 10,00 horas comezará o quecemento e ás 10,30 horas iniciarase o percorrido. Xa son máis de 500 os participantes para esta edición, por un prezo de 5 euros por dorsal para axudar á asociación.
En total, serán 6 quilómetros de percorrido, con saída e chegada ao parque de Castrelos, segundo indicou o alcalde, Abel Caballero. Ademais, haberá sorteos ao final da andaina.
