O grupo municipal Marea de Vigo cualificou este martes como “moi grave” o feito de que directivos de entidades veciñais, culturais ou sectoriais da cidade asinasen a adhesión á petición de indulto do exfuncionario condenado a prisión por ter ‘enchufado’ a unha cuñada de Carmela Silva nunha concesionaria municipal, sen consultar aos seus asociados.
Nun comunicado, este grupo municipal sinalou que esta forma de proceder supón unha “vulneración das garantías democráticas e das normas que rexen o tecido veciñal”, e que pode ter como consecuencia a dimisión ou destitución das directivas implicadas, porque os socios están “lexitimados” para pedirlles responsabilidades.
Neste caso, os asinantes adoptaron un “posicionamento político evidente” e “non é de recibo” que esa adhesión non fora sometida ao máximo órgano de decisión. Marea de Vigo instou a veciñanza asociada a estas entidades a “facer valer os seus dereitos de expresión e de decisión democrática” e constatou que moita dela se está queixando polo ocorrido.
Con respecto á “rumoroloxía” sobre supostas presións por parte de persoas vinculadas ao PSOE de Vigo e ao goberno municipal para solicitar eses apoios, este grupo municipal evitou pronunciarse, aínda que insistiu en que os posicionamentos de asociacións deben adoptarse por acordo dos seus membros.
