AVIBE convocou unha reunión coas asociacións e plataformas de Vigo para iniciar mobilizacións e buscar puntos en común en contra doPXOM da cidade. Foi o pasado xoves 10 de marzo ás 20:00 horas e alí estiveron Adega, a Asociación de Afectados pola ampliación do polígono de Balaídos, a Asociación de veciños da Curva de San Gregorio, a Asociación de veciños do Emilio Crespo de San Paio de Navia e a Asociación de veciños do Freixo.
Tamén acudiron a Asociación de veciños de Lavadores, a de Sárdoma, a de Teis, a de Valladares, a de Zamáns e por último a de Bembrive de Pé.
Dita reunión celebrouse na Asociación de veciños de Valladares e tiñan os seguintes obxectivos: a unión das asociacións e colectivos contra o PXOM de Vigo, a presentación de AVIBE como plataforma e dar a coñecer a problemática do vial PO-010, tratar as irregularidades no PXOM e recuperar o movemento veciñal de Vigo.
A reunión rematou de maneira exitosa onde as asociacións de veciños e colectivos participantes acordaron unha nova reunión prevista para o 30 de marzo na que se incorporen máis asociacións para continuar traballando nunha fronte común polo ben das parroquias, dos veciños e de Vigo.
