O portavoz de Industria do grupo parlamentario socialista, Martín Seco, pediu á Xunta que envíe á administración concursal de Hijos de J. Barreras informes técnicos que avalíen as ofertas presentadas polas empresas que optan á compra do estaleiro vigués, despois de presentar unha batería de iniciativas neste sentido na Cámara galega.

“A Xunta de Galicia, con competencias en materia de industria e emprego, debe apoiar a reivindicación realizada polos sindicatos e polas empresas e asociacións do sector”, reivindicou o dirixente socialista.

Martín Seco pediu ao Goberno galego que “avalíe e cuantifique” as propostas presentadas, tanto en materia industrial como en material laboral, co obxectivo de “dar continuidade á actividade industrial e garantir o emprego existente”. Neste marco, o parlamentario instou á Xunta a “apostar pola continuidade do estaleiro“, así como pola “aplicación dun plan de futuro que asegure unha carga de traballo suficiente como para garantir o mantemento do emprego propio e do emprego da industria auxiliar”.

“É necesario un proxecto industrial fiable e con garantías que dea estabilidade ao sector despois dos bandazos que leva dando o estaleiro”, subliñou Seco.