O Ministerio de Transportes, Mobilidade e Axenda Urbana adxudicou a construción dunha pasarela peonil para o Camiño de Santiago Portugués no Porriño por un importe de 233.741 euros.
Tal como informou o Goberno nun comunicado, esta actuación enmárcase nas previsións do Plan de Recuperación, Transformación e Resiliencia para mellorar as condicións de seguridade de usuarios vulnerables das estradas do Estado.
“A pasarela ten por obxecto establecer un itinerario seguro que permita o paso dos peóns, principalmente peregrinos, sobre o ramal entre a autovía A-52 e a estrada N-550. Esta actuación permitirá suprimir o actual itinerario, consistente nun cruzamento en superficie que xera situación de inseguridade por mor da escasa visibilidade”, explicou o Executivo central.
