A delegada territorial da Xunta en Vigo, Marta Fernández-Tapias, reclamou ao alcalde, Abel Caballero, que “deixe de imputarlle” ao Executivo autonómico o “fracaso” das súas negociacións co Goberno de Pedro Sánchez, en relación coa nova autovía Vigo-O Porriño, a Avenida de Madrid ou o AVE por Cerdedo.
Así o sinalou Fernández-Tapias despois de que Caballero anunciase a convocatoria dun pleno extraordinario, que se celebrará o próximo 1 de febreiro, “para que a cidade saiba o que Feijóo quere facer”, e que “non quere a nova autovía Vigo-O Porriño”.
Neste contexto, a delegada da Xunta insistiu en que o alcalde debería deixar de perder o tempo con críticas á Xunta e encararse a Sánchez para esixirlle que cumpra con Vigo. Tamén lembrou que foi Mariano Rajoy quen decidiu impulsar a construción desta nova autovía entre Vigo e O Porriño e que o actual Goberno socialista deixouna “nun caixón”.
“Dado o nulo interese do Goberno central por impulsar e executar esta nova autovía, o lóxico é que se formulen propostas alternativas”, sentenciou.
VIARIO DE BEADE
Marta Fernández-Tapias tamén tivo palabras sobre a “chapuza” da planificación viaria do novo Plan Xeral de Vigo (PXOM) que, ao seu xuízo, “presenta gravísimas deficiencias e erros de calado”, polo que ao alcalde “non lle pode sorprender” que a Xunta emita un informe desfavorable.
“Agora xa é tarde para falar dese tema”, insistiu a representante autonómica en resposta ás declaracións do alcalde sobre a ampliación da PO-010, cun novo viario que transcorrería polas parroquias de Beade, Bembrive ou Castrelos, entre outras.
Para ela, xa é tarde para consultar coa Xunta e tarde para dialogar cos veciños que se opoñen “frontalmente” a ese trazado.
“Tivo oportunidade de facelo durante a redacción do plan e non lle deu a gana, polo que a sorpresa do Concello non ten razón de ser. A Xunta non vai estar de acordo cunha vía que xera un importante rexeitamento por parte dos veciños”, sentenciou.
