A plataforma de afectados polo viario de Beade (AVIBE), designado como PO-010 no novo Plan Xeral de Ordenación Municipal de Vigo, saíu ao paso das declaracións realizadas nas últimas horas polo alcalde, Abel Caballero, e pola concelleira de Urbanismo, María José Caride, a quen acusou de tratar de “minimizar” o impacto que terá esta infraestrutura utilizando argumentos “incorrectos”.
A través dun comunicado a plataforma referiuse a as manifestacións da edila socialista, que insistiu en que o goberno local actúa con “sensibilidade” no deseño deste viario, ao prever que a maior parte do trazado sexa en túnel e viaduto para reducir a afección na contorna.
Respecto diso, lembraron que tanto un viaduto como un túnel terán impacto na zona, afectarán á biodiversidade do río Eifonso, danarán os acuíferos e terán consecuencias contaminantes para o medioambiente e para os veciños, ademais da afectación en elementos do patrimonio.
Por iso, tras insistir en que a PO-010 non conta con estudos ambientais nin técnicos que avalen a súa necesidade, salvo para dar servizo á Zona Franca, recomendaron á concelleira de Urbanismo “que non faga afirmacións a treo”. Así mesmo, apuntaron que, ademais das vivendas que haberá que expropiar, entre 4 e 11 segundo o propio Concello, haberá impacto tamén para outros veciños, polo incremento do tráfico, das emisións contaminantes, vibracións e outros problemas.
Con respecto á oferta do goberno local, de recolocar aos expropiados en zonas a propia contorna, en bolsas de vivenda de promoción municipal, AVIBE lamentou que o Concello “non entende a problemática que este viario ocasiona”, xa que “os veciños de Beade e Bembrive non quererían continuar vivindo no rural nesas condicións”. “Este viario non unifica, senón que rompe por completo ás parroquias e ás familias”, sentenciaron os afectados, á vez que cuestionaron a eficacia das “medidas correctoras” avanzadas pola concelleira de Urbanismo.
Finalmente, tras insistir en que “este viario non se sustenta nin xurídica nin tecnicamente”, lembraron que presentaron alegacións para que se elimine do novo plan, e advertiron de que esgotarán “todas as vías, administrativas e xurídicas, chegando aos tribunais e a Europa se é necesario” para evitar a súa construción.
