A Xunta de Galicia convocou para marzo e maio aos propietarios dos terreos afectados polas obras de mellora da seguridade na PO-330 que une Vigo con Vincios (Gondomar), en concreto nas zonas de Valladares e Pereiró.
Tal como indicou o Executivo galego, esta intervención suporá un investimento de 1,8 millóns de euros, tendo en conta o pago dos terreos necesarios para a execución da actuación. As obras foron licitadas o pasado mes de novembro e iniciaranse na primavera, cun prazo de execución de 10 meses.
Así, os actos para o levantamento das actas previas á ocupación terán lugar entre o 7 e o 8 de marzo en Vigo. A formalización das actas levará a cabo entre o 10 e o 11 de maio.
Esta intervención ten como obxectivo desenvolver un conxunto de actuacións integrais ao longo de case 7 quilómetros da vía autonómica na procura do reforzo da seguridade viaria e a mellora da accesibilidade nestes núcleos para evitar un tramo de concentración de accidentes.
A actuación inclúe a eliminación dun tramo identificado como de concentración de accidentes, situado no a parroquia viguesa de Valladares, mediante a creación dun carril central de espera que resolva de forma segura o acceso ao colexio Andersen.
Tamén se executarán dúas novas rotondas de 28 metros de diámetro, unha delas para mellorar o acceso á piscina municipal e ao pavillón de Valladares, e outra no Alto da Garrida, na intersección coa estrada A Garrida-Valladares (no cruzamento da farmacia), que mellorará a seguridade viaria do devandito cruzamento.
Pola súa banda, en Pereiró os traballos prevén a urbanización do primeiro tramo de 450 metros da vía, ata a rotonda que está fronte ao cemiterio.
