O comité de empresa de Nova Pescanova suspendeu os paros convocados para este martes, este mércores e este xoves despois de que a dirección ofrecese “mellorar a proposta” exposta para o novo convenio colectivo e ata que se produza a próxima reunión coa mesma.
Segundo detallan fontes sindicais, a oferta da empresa implica un aumento do 1% do salario para 2021. A dirección tamén ofrece un aumento por catro anos do 5,5%, o que supón por cada ano o 1,3%, para as categorías C e D.
Así mesmo, para as categorías A e B expón un incremento do 8,7% en catro anos, o que supón por cada ano o 2,1%, unha subida que afectaría a unha “minoría” pois aos traballadores con máis de 3 anos de experiencia non se lle aplicaría. Ademais, o comité detallou que esta proposta vén condicionada “á baixa do salario base a case 600 euros”.
Tras recibir este luns unha comunicación na que a empresa manifestou estar disposta a “mellorar a proposta”, todos os sindicatos con representación no comité de empresa –CIG, CCOO, UGT, USO e CUT–acordaron por unanimidade aprazar os paros convocados ata despois da seguinte reunión.
