Unha muller necesitou ser evacuada en helicóptero medicalizado no mediodía deste sábado despois de ser atropelada por un camión no concello pontevedrés da Cañiza. O vehículo implicado continuou a marcha tras o impacto. Segundo informa o 112 Galicia, foron os profesionais de Urxencias Sanitarias-061 os que chamaron sobre as 13,30 horas para informar á central de emerxencias de que a aeronave con base en Ourense partía cara ao punto do incidente.

O atropelo ocorreu á saída da A-52 e, segundo os datos facilitados ao 112 por unha testemuña do accidente, o condutor do camión continuou a marcha. A central de emerxencias, para prestar apoio ao equipo médico e restablecer as condicións de seguridade na vía, pasaron o aviso aos membros do GES-SPEIS de Ponteareas, aos axentes da Garda Civil de Tráfico e ao servizo de mantemento da estrada.