O PP de Vigo cre que o adianto electoral anunciado por Pedro Sánchez este luns é a “mellor noticia” para España e para a cidade, mentres que o BNG local veo como unha “oportunidade” de “apoio masivo” para que Galicia teña unha “representación determinante” no Congreso.

Nun audio enviado aos medios de comunicación, a presidenta dos ‘populares’ vigueses, Luisa Sánchez, considerou que as eleccións eran a “única opción” de Pedro Sánchez. Ela criticou que a “inestabilidade política” dos últimos anos afectase a proxectos “crave” para a cidade, polo que o novo Goberno ten “moitas cousas” que solucionar, referíndose a a prolongación da A-52, a Peinador, á Biblioteca do Estado ou á declaración do porto como Nodal, entre outras. Sánchez subliña que Vigo necesita un cambio político porque un Goberno “bloqueado” é “incapaz” de lexislar, ao carecer de apoios e orzamentos, engade.

Pola súa banda, o portavoz do BNG de Vigo, Xabier Pérez Igrexas, reivindicou que o próximo 29 de novembro os vigueses terán a oportunidade de facer que Galicia teña un “peso determinante” no Congreso para “seguir facendo valer os intereses do pobo galego” e “cortar o paso á ameaza reaccionaria da dereita ultraespañolista”.

Para el, estas eleccións son un “reto” e unha “oportunidade”, asegurando que o “masivo apoio” dos vigueses ao BNG fará realidade que Galicia teña unha representación “determinante” en Madrid. “O voto galego ten que servir para abrir paso a cambios de verdade. E para iso a papeleta da esperanza para os galegos é a do BNG”, engadiu Igrexas nun comunicado.