O alcalde de Vigo, Abel Caballero, volveu expresar este xoves o seu apoio aos veciños afectados polo PIA de Lavadores (ámbito Ofimático) e sinalou que responsables de Urbanismo mantiveron unha reunión con eles.
Nas declaracións remitidas polo PSOE de Vigo, Caballero insistiu en que o goberno local defende que os afectados e a Xunta “pacten unha compensación pola expropiación dos seus terreos que sexa xusta e axeitada”. “Pero tamén queremos que se garantan os realoxos das familias”, engadiu.
“Porque o que non pode ser é que aquelas cuestións que teñen interese común e global, e isto é significativo, supoñan un dano importante para os propietarios deses terreos”, proclamou, e reiterou que os afectados deben ser tratados “de acordo co valor da súa propiedade e co que significa que teñan que deixar ben o espazo ou, nalgúns casos, a súa vivenda”.
