O alcalde de Vigo, Abel Caballero, vaticinou que a oposición terá “castigo” por ser “responsable” de que non saísen adiante os decretos para “resolver o problema da vivenda”, e sinalou directamente a Alberto Núñez Feijóo; ao tempo que proclamou que o PSOE “sae a gañar” as eleccións do 29 de novembro.
En declaracións aos medios tras a inauguración do Congreso Conxemar-FAO en Vigo, o rexedor olívico lembrou o acontecido nos últimos días, algo de “importancia capital en España”, como foi “a negativa do PP a apoiar o alugueiro a prezo razoable e a forma de resolver o problema da vivenda de centos de miles de persoas neste país”.
O alcalde de Vigo defendeu que os dous decretos presentados no Congreso “eran un avance moi importante”, nun escenario en que a economía española vive un momento “excepcional”, co maior nivel de emprego, a recuperación dos salarios a través do SMI e medidas de política social. Mentres, destacou, o PP estivo “traballando durante anos e meses para adiantar as eleccións e para non resolver os problemas”. A este respecto, sinalou que o Goberno quixo resolver o principal problema que preocupa a cidadanía e quixo dar “un paso moi importante”, ao que Feijóo “se opuxo ferozmente”.
“En Galicia, da política de vivenda de Feijóo sabemos moito”, sinalou, e incidiu en que o goberno galego presidido polo líder do PP non fixo “nin unha soa vivenda de alugueiro a prezo taxado” en Vigo. Así, ante a convocatoria anticipada de eleccións xerais, Abel Caballero valorou que as campañas electorais son “unha forma máis de relacionarse coa xente” e teñen “un plus adicional”. “E saímos ás eleccións a gañar. O PSOE sae ás eleccións a gañar. Aí nos veremos, aí debateremos e confrontaremos ideas”, remarcou.
A este respecto, instou Feijóo a explicar na campaña “por que non quere que se arranxe o problema da vivenda en alugueiro” e sinalou que tamén se debe debater sobre a aplicación de políticas sociais, sobre como manter os niveis de emprego ou sobre como se reparte o valor engadido que xera a economía.
Para Caballero, a postura da oposición con respecto á vivenda “vai ter un castigo”, e insistiu en que Pedro Sánchez foi “o mellor presidente do Goberno” para a cidade de Vigo. “Nunca nos negou nada do que lle expuxemos”, repetiu, e insistiu: “Afrontamos a campaña electoral para gañala, para lle contar á xente que queremos facer e seguiremos nesta liña”. “As eleccións saen adiante, e convócanse porque Feijóo non quixo apoiar a solución para millóns de persoas”, concluíu. solución para millóns de persoas”, resolveu.
