Un equipo composto por cinco especialistas, entre cirurxiáns plásticos e reconstrutores, traumatólogos e anestesistas, logrou reimplantar con éxito o brazo dun traballador de Marín que resultou seccionado nun accidente laboral.
O pasado 6 de xullo, Víctor Santiago de Rosario atopábase no porto de Marín manipulando unha carretilla elevadora das que se utilizan para transportar palets cando, por un fallo mecánico, os ganchos da carretilla esborralláronse sobre o seu brazo esquerdo, seccionándoo por baixo do cóbado.
Trasladado de urxencia a Povisa por unha ambulancia medicalizada do 061, foi intervido baixo a coordinación da cirurxiá plástica e reconstrutora Margarita Arnáiz durante 9 horas. Uníuselle en primeiro lugar o óso con placas e parafusos, reconectáronse arterias e venas para recuperar a irrigación e suturáronse tamén nervios, músculos e tendóns.
Trala cirurxía, permaneceu 24 horas na Unidade de Coidados Intensivos, pasando posteriormente á planta de hospitalización. Varios días logo da intervención, e pasada a primeira semana crítica, o paciente evoluciona favorablemente e será dado de alta nos próximos días, antes de iniciar o seu período de rehabilitación.
