O ‘Galician Freaky Filme Festival’, que se celebra en Vigo a finais de setembro, recibiu un total de 677 pezas audiovisuais para a súa quinta edición, a maior cifra desde o seu nacemento en 2017. Delas, o 17% son producións galegas, un dato que tamén crece respecto de anos anteriores.

Segundo afirma a organización do festival nun comunicado, o certame celebrarase do 29 de setembro ao 2 de outubro deste ano con propostas de diversos países do mundo: un 23% procede de América, o 17% de Oceanía, máis do 12% de países europeos e o 7% de Asia.

Unha das novidades da quinta edición do festival é a celebración do ‘Pequefreak‘, unha xornada cunha programación propia de traballos audiovisuais para os máis pequenos, que se divide por franxas de idade que van dos 4 aos 15 anos. Ademais, tamén haberá unha actividade de realidade virtual e talleres ‘freaks’ para os nenos.

O equipo de programación do evento encargarase de visionar previamente o material para dar forma á sección oficial, composta por case 60 obras, “a maior parte delas, curtametraxes”.