O Goberno de Vigo aprobou o programa de actividades da festa de Nadal que se desenvolverá entre novembro de 2021 e xaneiro de 2022, no que contará con mercados temáticos, atraccións recreativas e infantís, casetas de venda, unha nora “xigante”, pistas de xeo e un tren turístico.

Así o comunicou este xoves o alcalde, Abel Caballero, tras a aprobación deste programa, no que tamén se acorda que se promoverá unha convocatoria para “captar propostas atractivas e preferiblemente de carácter innovador” ambientadas no Nadal, como espectáculos de inverno, atraccións 3D, talleres infantís e atraccións acuáticas.

Estas actividades desenvolveranse nos espazos dispostos en Teis, Bouzas, Travesas, Berbés, Coia, Praza de Portugal e Praza Elíptica. Con esta planificación, destacou Caballero, facilítase “a transparencia e a participación cidadá nos proxectos”.

Así mesmo, o Goberno tamén iniciará un procedemento administrativo para pór en marcha trens turísticos que oferten distintos percorridos pola cidade; así como para dispor atraccións recreativas como carruseis, un tren infantil, pista de xeo e pista de karts.

A programación municipal aprobada volve incluír o mercado Cíes Market, con 50 casetas de venda, nora xigante, parque de lecer, atraccións recreativas, rampla de xeo, iluminación, decoración e tren turístico. Así mesmo, recolle o mercado temático de Nadal no Calvario, cun mínimo de 10 casetas de venda, decoración, iluminación e actividades de animación.

Finalmente, o Concello contempla a realización de actividades e espectáculos de animación sociocultural, como concertos e un circo temático de Nadal, para o que tamén abrirá un concurso público por concorrencia competitiva.