O BNG proporá no pleno do Concello de Vigo aumentar a mobilización de recursos extraordinarios na cidade a 23,5 millóns de euros para destinalos “a atender as necesidades reais derivadas dos efectos sociais, laborais e produtivos da crise da covid-10 fronte ás grandes inauguracións”.
A través dun voto particular, emitido despois de que o Goberno local “rexeitase todas as emendas da oposición”, o BNG vigués propón financiar varias actuacións a cargo de remanentes líquidos de tesouraría por importe de 20,8 millóns de euros. O resto dos fondos provirían da supresión da partida destinada a subvencións para aerolíneas, de case 2,7 millóns.
Trátase dunha proposta alternativa á que realizou o Goberno municipal, que pasaba por incorporar outros 13 millóns de euros de remanentes para acometer unha decena de actuacións, entre elas o denominado proxecto ‘Halo‘, un ascensor que conectará García Barbón co centro Vialia e que inclúe unha zona circular de paseo-miradoiro elevado a máis de 40 metros.
En concreto, con esta proposta o BNG aposta por destinar 10 millóns de euros a un programa de axudas directas ao tecido comercial e pequenas e medianas empresas (pemes); 2,5 millóns a un programa de axudas extraordinarias á industria cultural; e 1,5 millóns a un programa de apoio ao tecido asociativo.
Finalmente, expón incrementar a partida orzamentaria destinada ao Plan Municipal de Emprego, con 2,5 millóns de euros máis; e reclama “pór fin ao total abandono que padecen os barrios e parroquias da cidade”, para o que esixe un plan de melloras e actuacións que mobilice 7 millóns de euros.
