A nova ordenanza municipal de terrazas en Vigo prevé instalacións permanentes, que deberán cumprir un criterio “estético”, e contempla a posibilidade de ampliar espazos para os locais de hostalaría eliminando prazas de aparcadoiro “se fose necesario”.

Así o trasladou o alcalde, Abel Caballero, tras manter unha reunión coa Federación provincial de Empresarios de Hostalaría (FEPROHOS). Segundo explicou, a nova norma manterá a taxa “cero” de ocupación de espazo público por estas terrazas e permitirá, no caso de que non haxa espazo suficiente nas beirarrúas, amplialas coa instalación de tarimas, eliminando zonas de aparcadoiro.

Segundo indicou o rexedor, tamén se contemplan as instalacións permanentes, que deberán seguir un criterio estético e ser homoxéneas nunha mesma zona.

Con respecto ás instalacións xa existentes, Abel Caballero sinalou que os locais poderán mantelas, en tanto non se normaliza a situación e non están amortizadas, pero as instalacións “teñen unha caducidade” e deberán ser substituídas.

Finalmente, sinalou que, á espera de coñecer como se xestionarán as axudas anunciadas polo Goberno central, o Concello estuda como se pode dar ao sector facilidades financeiras para afrontar eses cambios nas terrazas.