A Autoridade Portuaria de Vigo alcanzou un acordo con Zona Franca para a recuperación de 65.000 metros cadrados da chaira do recheo de Bouzas, e que actualmente forman parte da concesión administrativa ao organismo estatal.
Segundo informou en rolda de prensa o presidente do Porto, Jesús Vázquez Almuíña, iniciouse a tramitación para recuperar ese espazo, que servirá para gañar operatividade na terminal e apontoar os tráficos de automoción.
O Consello de Administración do Porto, reunido este venres, deu luz verde á declaración de interese portuario dese espazo, o primeiro paso para recuperalo. Esta declaración será sometida a aprobación dos órganos executivos de Zona Franca e será validada definitivamente noutra sesión do Consello de Administración do Porto.
Zona Franca é actualmente titular dunha concesión administrativa na área portuaria de Bouzas de 142.052 m2, dos que 77.028 m2 albergan edificacións destinadas a oficinas e naves, incluídos os seus viarios e zona de servizos, e os 65.024 m2 restantes son exclusivamente de chaira, é dicir, sen edificacións, e son os que serán devoltos ao Porto.
Esta medida, explicou Vázquez Almuíña, enmárcase nas actuacións da Autoridade Portuaria para optimizar, reordenar e gañar espazos nos seus terminais, unha necesidade derivada, entre outros, do aumento de tráfico ro-ro (polo incremento de produción na planta de PSA, Grupo Stellantis). No entanto, a recuperación dese espazo non exclúe a necesidade de gañar tamén zona de atracada, segundo matizou o presidente do organismo.
A tramitación deste acordo é consecuencia directa do protocolo xeral de actuacións conxuntas que ambas as entidades subscribiron o pasado mes de xullo para o impulso e desenvolvemento socioeconómico de Vigo e a súa área de influencia. O documento establecía, entre outras cuestións, a posible redución do ámbito concesional do Consorcio da Zona Franca, concretamente da parcela que, na actualidade, atópase arrendada ao grupo PSA para o almacenamento temporal dos seus vehículos.
TRÁFICOS DE XANEIRO
Por outra banda, Vázquez Almuíña tamén informou en rolda de prensa dos datos de tráficos da terminal olívica durante o mes de xaneiro, uns datos que confirman o crecemento do Porto en practicamente todas as áreas.
No primeiro mes de 2021 o tráfico total de mercadorías creceu un 9,46 %. Así, a mercadoría xeral rexistrou un incremento do 8,48 % e a mercadoría contenerizada subiu en TEUS (+18 %) e en toneladas (+16 %).
Con respecto ao tráfico de vehículos, o porto de Vigo púxose, por primeira na historia, como líder a nivel nacional. De acordo coas estatísticas de Portos de Estado, a terminal olívica moveu en xaneiro 41.712 vehículos, fronte aos 40.511 de Valencia e os 3.751 de Barcelona, os seus principais competidores.
Na mesma liña, Vigo sitúase á cabeza en tráfico de pesca, cun rexistro de 2.007 toneladas o mes pasado, aínda que a pesca fresca aínda non recuperou os niveis do exercicio anterior, lastrada polas restricións que afectaron á hostalaría.
