O secretario xeral de Anfaco-Cecopesca, Juan Vieites, confiou en que o primeiro ministro británico, Boris Johnson, e a presidenta da Comisión Europea, Ursula von der Leyen, que se reunirán este mércores, “saiban chegar a un acordo” esta semana que permita “desactivar o Brexit duro comercial”.
Preguntado tras unha rolda de prensa telemática, Juan Vieites recalcou que as “incertezas” afectan de “maneira negativa” ao comercio, polo que mostrou a súa esperanza de que “se non é o plan A (o acordo), o plan B” que se articule entre en vigor o 1 de xaneiro. Ademais, apuntou que o Parlamento Europeo deberá dar o visto e prace na súa última sesión deste ano.
En todo caso, o secretario xeral de Anfaco-Cecopesca advertiu de que “un Brexit duro sería malo para ambas as partes”, polo que considerou que Reino Unido e a UE “estarán na mesma páxina nalgúns asuntos chave” e incidiu na importancia de que este asunto “se poida concluír esta semana”.
Nesta liña, remarcou que o rumbo das negociacións, que se atopan “nas súas horas decisivas, “será clave para o futuro das relacións entre a UE e Reino Unido”. Deste xeito, alertou de que, se non se alcanza este acordo comercial, o británico “sería como un país terceiro” en relación ás exportacións e importacións de mercadorías.
NEGOCIACIÓNS
Precisamente, Bruxelas subliñou que as negociacións poderían continuar se o acordo non chega a tempo para que poida entrar en vigor o próximo 1 de xaneiro, cando se consolide a ruptura entre Reino Unido e a Unión Europea, aínda que iso non impediría as consecuencias inmediatas dun Brexit sen acordo.
Así as cousas Juan Vieites apuntou que, tras xaneiro, a situación poderíase concretar “en tres estadios”, “en marzo, abril e xullo, en función do previsto”. Ademais, valorou que Reino Unido “dese un paso” ao eliminar as cláusulas da Lei de Mercado Interior que violaban o acordo do Brexit e que deseñou para esquivar o cumprimento de varias disposicións do Tratado de Retirada que afectaban á fronteira no Úlster.
PLAN DE ACCIÓN
Por outra banda, a patronal conserveira, Anfaco-Cecopesca, puxo en marcha un plan de acción dunha estratexia de valor compartido aliñada coa Axenda 2030 e que busca potenciar a sustentabilidade da entidade e o sector e a innovación do mesmo con apoio da Consellería do Mar.
O secretario xeral de Anfaco-Cecopesca, Juan Vieites, explicou que a iniciativa foi promovida pola entidade e empresas do sector e que se desenvolverá ata 2030 co obxectivo de “reforzar a apropiación do valor compartido da industria conserveira”.
