O Grupo Parlamentario Socialista na Cámara galega reclamará á Xunta o “desbloqueo” da mellora de dúas vías de titularidade autonómica ao seu paso por Redondela.

Así o trasladou a deputada autonómica socialista Leticia Galego á alcaldesa de Redondela, Digna Rivas, nun encontro mantido nesta localidade, onde lle avanzou que se presentarán iniciativas parlamentarias para pedir a execución das actuacións pendentes.

En concreto, abordaron a mellora da PO-363 na avenida Mendiño e o resto do tramo Redondela-Cesantes, así como a da PO-250 entre Pazos de Borbén e Redondela.

Así, a rexedora indicou que permanece pendente a resposta da Axencia Galega de Infraestruturas ás alegacións presentadas polo Concello para pechar o convenio da remodelación da PO-363. Tamén lembrou que o acordo remitido previamente pola Xunta imputaba ás arcas municipais o custo da semaforización, que non é de competencia local, e non detallaba a achega da axencia autonómica.

Ademais, Leticia Gallego constatou que o Goberno galego recibiu en abril as alegacións do Concello mentres este último non obtivo unha resposta ás mesmas, un asunto que avanzou que levará ao Parlamento de Galicia.

No encontro tamén se indicou que o goberno local reiterou a urxencia da mellora do primeiro tramo da PO-250 dada o seu perigo para os peóns e a caída dun muro, unha actuación que non se iniciou.