A Fiscalía solicita 5 anos de prisión por un delito continuado de abusos sexuais para un home acusado de abusar sexualmente da súa filla, e que será xulgado este mércores na sección quinta da Audiencia Provincial de Pontevedra.

Segundo o escrito de acusación pública, os feitos ocorreron durante as visitas que a menor facía a casa do seu pai (os seus proxenitores estaban separados). Alí, e coa escusa de “xogar ás cóxegas”, o acusado facíalle tocamentos nas súas partes íntimas para “satisfacer os seus instintos sexuais”.

O pai actuaba así “a pesar de que a menor lle dicía que a incomodaba” e realizou este tipo de actos en varias ocasións, de forma continuada no tempo, ata que a nena contoullo á súa nai e as visitas cesaron (en abril de 2019).

Por estes feitos, a Fiscalía considera ao acusado autor dun delito de abusos sexuais continuados sobre menor de 16 anos, e pide que sexa condenado a 5 anos de prisión, e que indemnice á nena en 3.000 euros.

Así mesmo, reclama que se lle impoña a prohibición de achegarse ou comunicarse coa súa filla durante outros 8 anos e que sexa inhabilitado para calquera profesión ou oficio que requira contacto con menores, polo mesmo período de tempo.