O grupo municipal Marea de Vigo reiterou este xoves que a previsión de vivenda do novo Plan Xeral de Ordenación Municipal (PXOM) da cidade é “desproporcionada” e tamén cuestionou a reserva de chan urbanizable.

Así o trasladou nunha rolda de prensa o portavoz do grupo, Rubén Pérez Correa, quen sinalou que xa o documento de alcance sobre a avaliación estratéxica ambiental remitido pola Xunta apunta a que a administración local ten que facer unha serie de “deberes”.

Entre os cambios que se deben expor, e cos que coincide a Marea de Vigo, debe “repensarse” a previsión de novas vivendas porque unha estimación de 50.000 vivendas necesarias é “desproporcionada” e “non se corresponde coas previsións demográficas” nin coa evolución da actividade edificatoria nos últimos anos.

Ademais, e en relación con iso, Rubén Pérez sinalou que o Concello debería modificar a ocupación de chan rústico para convertelo en urbanizable baseándose nesas previsións de novas vivendas.

Con respecto ao chan industrial, lembrou que a propio PXOM recoñece que hai “chan ocioso” e que non ten sentido contemplar actuacións como a ampliación do polígono da Pasaxe cara a zonas habitadas.