A Dirección Xeral de Ordenación do Territorio e Urbanismo da Xunta de Galicia trasladou este xoves ao Concello de Vigo o informe no que analiza o borrador do novo Plan Xeral de Ordenación Municipal (PXOM), e no que se indican os aspectos que “deberán ser revisados”.
Así, a través dun comunicado, a administración autonómica sinalou que este xoves se deu a coñecer ese informe, nunha reunión convocada polo Concello para a constitución da comisión de seguimento da PXOM (unha comisión cuxa creación estaba prevista no convenio asinado entre ambas as administracións para o cofinanciamento dos traballos de redacción do novo plan, polo que a Xunta achega algo máis dun millón de euros).
Con respecto ao informe sobre o borrador da PXOM, a Xunta sinala algunhas cuestións que deben revisarse, como a información respecto das redes de servizos en ámbitos de chan urbano, a adaptación plena do documento á Lei do Solo (en canto á clasificación do chan rústico), ou a articulación de aspectos referirdos a espazos costeiros e o seu encadre no Plan de Ordenación do Litoral.
Tras a emisión do informe e realizadas as consultas correspondentes a Urbanismo da Xunta, a Dirección Xeral de Calidade Ambiental e Cambio Climático “está xa en disposición de formular o documento de alcance do estudo ambiental estratéxico“. Ese estudo ambiental debe incluír a todas as administracións que deban emitir informe sectorial, segundo a lexislación aplicable.
Para formular o devandito documento, este departamento de Medio Ambiente dispón dun prazo de dous meses, aínda que a Xunta confirmou que poderá contar co mesmo a finais de setembro. A partir de aí, o Concello deberá elaborar o estudo ambiental estratéxico atendendo aos criterios contidos nese informe da Xunta, e aplicando a lexislación vixente.
