A campaña electoral de VOX só respeta a cultura galega e ao idioma propio de Galicia para o seu cancelo de campaña #GaliciaÉVerde así como o vídeo de “La abueliña” de Abascal á que de momento non obrigou a falar en castelán para aplicando a proposición non de lei que a formación de ultradereita presentou no congreso en febreiro deste mesmo ano onde pretendía implantar “probas de castelán para garantir que todos os españois o falan ben”
A última foi o repetido discurso de Ortega Smith en Xinzo e Pontevedra. No seu discurso fronte ao edificio do Concello de Pontevedra, omde goberna BNG co PSdeG, e a escasos metros do instituto Valle-Inclán, onde o propio Castelao exerceu como profesor, Ortega Smith volveu a chamar “antiespañol, racista e xenófobo” ao intelectual galego que viuse na obriga de exiliarse a Arxentina para evitar a represión franquista.
O deputado de Vox xa usara estas palabras este venres, en Xinzo de Limia, para referirse ao galeguista que dá nome a un dos recoñecementos anuais que dá a Xunta de Galicia –xunto coas Medallas de Galicia–, tal e como son as Medallas Castelao.
Precisamente, estes galardóns entréganse cada 28 de xuño (este domingo) nun acto que, como é habitual, preside o xefe do Executivo autonómico, Alberto Núñez Feijóo, coincidindo coa dobre efeméride do plebiscito do Estatuto de Autonomía de Galicia do ano 1936 e a repatriación dos restos do político, escritor e debuxante galego.
Precisamente, estas palabras de Ortega Smith foron obxecto de balbordo nas redes sociais na xornada do sábado e tamén se pronunciaron en contra Podemos Galicia e o BNG, entre outras voces.
“Ortega Smith en Xinzo de Limia chamando racista e xenófobo a Castelao. Con este tipo de xente é coa que quere gobernar Feijóo. Non o imos permitir. A esquerda temos que gañar estas eleccións. Se ti votas, Feijóo e Vox perden”, sinalou Podemos.
Pola súa banda, o BNG apunta que “Castelao é a principal figura da nación galega no século XX”. “E o nacionalismo galego é emancipador, igualitario, republicano, pacifista, internacionalista. Para un fascista falar de Castelao ou de nós, primeiro debe lavar a boca. #CastelaoSempre”, tuitearon os nacionalistas.
