O peirao de Bouzas foi o escenario este xoves do embarque de 200 tripulantes no Solitaire, un buque supply (como se denomina ás embarcacións que transportan e almacenan materiais, equipos e persoal para traballar en instalacións en alta mar), de 405 metros de eslora, 40 de manga e 15 de calado.

A empresa IMOS ( International Marine Offshore), do grupo Tesol, coordinou a entrada do buque no porto de Vigo para que embarcaran os 200 tripulantes, na súa maioría galegos, pero tamén asturianos e vascos. Estes estiveron aloxados e confinados en distintos hoteis á espera das probas da covid-19.