Unha avaría na válvula dun depósito provocou unha fuga de gas no termo municipal de Ponteareas (Pontevedra), pero non houbo persoas afectadas.
O Centro Integrado de Atención ás Emerxencias (CIAE) 112 Galicia tivo constancia do sucedido sobre as 17,30 horas deste mércores, cando efectivos de Protección Civil da localidade comunicaron a súa saída ao servizo de emerxencias.
Segundo indicaron, fora alertados por un particular dun cheiro a gas na vía pública, na Praza da Perillana, en Ponteareas. Segundo o seu relato, había varios depósitos de gas pertencentes aos veciños dun edificio situado na devandita Praza. Por iso, o 112 Galicia puxo os feitos en coñecemento dos Bombeiros de Ponteareas e da Policía Local, que xa tiñan constancia do sucedido.
Así mesmo, aínda que o alertante asegurou que non había persoas afectadas, por parte do 112 avisouse, por precaución, a Urxencias Sanitarias de Galicia-061.
Tras chegar ao lugar e confirmar o cheiro na rúa, os bombeiros comunicaron que se tratou dunha avaría na válvula dun dos tres depósitos que había no edificio e que contiñan gas propano. Un deles, o avariado, baleirouse, e foi o que provocou a fuga.
A zona foi acordoada, mentres xunto cos técnicos da empresa subministradora procederon a facer o transvasamento do gas dos outros dous depósitos afectados. Non houbo feridos e tampouco foi necesario desaloxar aos veciños das súas vivendas, pero, segundo indicaron os bombeiros, aconselláronlles que pechasen as xanelas. O mesmo corpo confirmou que, tras facer o transvasamento, a avaría quedou liquidada.
