O Concello de Ponteareas demolerá un supermercado Eroski situado na parroquia de Angoares, cuxa licenza foi anulada en 2008, e tras rexeitar o Tribunal Superior de Xustiza de Galicia (TSXG) o seu último recurso de reposición.

Segundo sinalou o goberno municipal (de BNG e PSOE) a través dun comunicado, os trámites para proceder á derriba xa se iniciaron hai 4 meses e, a día de hoxe, están a realizarse “as xestións para contratar a redacción do proxecto de demolición“. Unha vez redactado ese proxecto, licitaranse e executarán as obras.

O goberno ponteareán, presidido polo nacionalista Xosé Represas, expresou a súa “preocupación” porque, se leva a cabo a demolición, a administración local “podería enfrontarse a reclamacións económicas de enorme contía”. Todo iso pola anulación dunha licenza concedida en 2002 (por un goberno local do PP).

“A única posibilidade de evitar a demolición e os posibles prexuízos económicos para o Concello pasa pola aprobación do Plan Xeral, actualmente en mans da Xunta para a súa aprobación definitiva”, advertiron, e urxiron á Xunta a que dea o visto e prace ao documento urbanístico para evitar “un gravísimo problema” xerado por “gobernos anteriores”.

Finalmente, o goberno de Ponteareas advertiu de que, neste municipio, existen outras instalacións industriais e comerciais en zonas como o Polígono da Lomba, sobre as que tamén pesan ordes xudiciais de demolición, que só se pode evitar como o novo plan.