O alcalde en funcións de Tui (Pontevedra), Carlos Vázquez Padín, anunciou este martes que non recollerá a súa acta de concelleiro electo polos malos resultados obtidos pola súa candidatura nas eleccións do domingo.

Acompañado pola concelleira Milagros González, o rexedor en funcións confirmou que non será concelleiro e, dado que a propia González (número 2 na súa lista) tamén renunciou, a representación de Converxencia 21 no pleno estará en mans do terceiro da candidatura, José Manuel Palacín.

Vázquez Padín, que foi concelleiro polo BNG entre xuño de 1999 e decembro de 2001, entrou como edil de Converxencia 21 en 2011. Nas eleccións de 2015 o seu partido logrou dous representantes nunha fragmentada corporación, que presidía o socialista Enrique Cabaleiro, e que contaba con oito partidos.

En outubro de 2017, aprobouse unha moción de censura auspiciada polo centro dereita que outorgou a alcaldía a Vázquez Padín, a pesar de que non lideraba o grupo maioritario da oposición (tiña 2 concelleiros, fronte aos 4 do PP).

Nas eleccións do domingo, o PSOE de Enrique Cabaleiro fíxose coa maioría absoluta, ao subir de 3 a 9 concelleiros, mentres que todos os partidos que asinaran a censura e que concorreron aos comicios foron severamente castigados. Entre eles, Converxencia 21, que pasou de dous a un edil.

“É unha asunción de responsabilidades, derivada da decisión soberana dos cidadáns de non apoiar a nosa candidatura”, xustificou Vázquez Padín, quen interpretou eses malos resultados como “unha negativa dos cidadáns a referendar ao alcalde”.

POSIBLES MOTIVOS DA DERROTA ELECTORAL

O alcalde en funcións recoñeceu que “é complexo” atopar unha soa causa para a derrota electoral do seu partido, e vinculou os resultados a varios factores.

Así, en primeiro lugar, admitiu que “quizá a moción de censura non estivo ben explicada, ben xustificada”. Por outra banda, sinalou que tamén puido influír “o recordo de voto das xerais”.

Ademais, Vázquez Padín lamentou que, nos seus 18 meses como rexedor, non tivo tempo de visitar todas as parroquias e que moita da súa dedicación estivo centrada en xestionar as consecuencias da traxedia de Paramos (un matrimonio perdeu a vida, houbo decenas de feridos e cuantiosos danos materiais pola explosión dun almacén pirotécnico ilegal nesta parroquia, hai un ano).

Na súa opinión, “non se valorou a gran xestión da crise de Paramos”, nin outras iniciativas, como a apertura da rúa Ourense ou os cambios no departamento de Urbanismo.

No entanto, Vázquez Padín aclarou que, a pesar da súa renuncia, “a intención é que o partido siga tendo actividade”, e avogou por traballar de cara ás eleccións municipais de 2023. Ata entón, insistiu, Palacín exercerá unha “oposición construtiva e respectuosa” na corporación tudense.