En virtude dun acordo asinado entre Abanca e o Consello Regulador da Denominación de Orixe Ribeiro, os viticultores da segunda poderán acceder a préstamos específicos con prazos de amortización amplos e baixos intereses.
Segundo detallaron as entidades nun comunicado, o presidente do Consello Regulador, Juan Manuel Casares, e o director de zona de Abanca en Ourense Oeste, Carlos Díez, rubricaron un novo convenio para permitir que os produtores poidan acceder a unha conta de crédito para financiar gastos de abono, fertilizantes e poda, entre outros, cun prazo máximo de ata cinco anos.
A oferta tamén inclúe outros produtos, como liñas de comercio exterior, financiamento a través de ‘leasing’, ‘confirming’, ‘factoring’,avais e anticipos de subvencións e impostos.
Ademais, a entidade bancaria ofrecerá seguros específicos para o sector, como o Agroseguro, o destinado a pemes-adegas e o de responsabilidade civil. Así mesmo, incluirase unha liña de financiamento específico para seguros agrarios con prazo ata 12 meses.
Os viticultores tamén poderán acceder a un programa do banco en virtude do que será posible evitar os gastos de mantemento de contas e cartóns, así como os derivados de transferencias.
