O estudo de arquitectura navarrol Vaíllo Irigaray e Asociados alzouse como gañador do concurso de ideas convocado pola Zona Franca de Vigo para a construción do World Car Center en Balaídos, cun proxecto que ofrece “un edificio icónico que se converterá na carta de presentación do sector da automoción”.
Segundo informou este venres en rolda de prensa o delegado de Zona Franca, David Regades, o xurado elixiu este proxecto, denominado ECOHUB.WCC, pola súa calidade arquitectónica, o seu carácter industrial e tecnolóxico, e a eficaz integración na contorna.
Así mesmo, valorouse a polivalencia e flexibilidade dos espazos, os accesos orientados ao polígono e ao estadio de Balaídos, o ‘green hub lab’ exposto na cuberta, a inclusión dunha praza ou a sustentabilidade ambiental do edificio, que tamén integra un espazo arboledo na parcela.
O World Car Center estará formado por dous edificios conectados por catro plantas dun inmoble preexistente e a súa construción conta cun investimento de 14 millóns de euros. No seu interior albergará a aceleradora de ‘start-ups’ da automoción (Business Factory Auto); a sede da Universidade Corporativa de CEAGA; unha incubadora de alta tecnoloxía e centro de innovación (High Tech Auto); un laboratorio de materiais e procesos produtivos; auditorio; cafetaría; etc.
