O grupo municipal Marea de Vigo propuxo este xoves que o goberno local solicite ao Ministerio de Fomento a declaración de ‘obrigado servizo público’ (OSP) para as rutas que operan desde Peinador a Madrid e Barcelona, de maneira que poidan contar con financión das administracións central e autonómica, e teñan prezos máis competitivos.

Así o trasladou en rolda de prensa o portavoz do grupo, Rubén Pérez Correa, quen apuntou que este sería “un bo primeiro paso” para consolidar rutas estratéxicas desde a cidade olívica, e acabar coa “batalla” entre o Concello e o Goberno galego acerca do financiamento de voos.

A ese respecto, o portavoz de Marea incidiu en que a subvención directa a liñas aéreas privadas, a través de “supostos concursos públicos” é unha “política fracasada”, como quedou de manifesto con Ryanair. Segundo sinalou, esta compañía é “especialista en captar diñeiro público” e “logo darse o piro”, como ocorreu en Vigo.

Por iso, Marea de Vigo expuxo que se solicite a declaración de OSP para as conexións con Madrid e Barcelona, unha consideración que xa teñen outras conexións en España, como os voos desde Canarias, a ruta Almería-Sevilla, ou as liñas de Badaxoz a Madrid e Barcelona. “Se Badajoz pode, Vigo tamén”, sentenciou.