O alcalde de Vigo, Abel Caballero, expresou este mércores o “recoñecemento” e “orgullo” do goberno local e da cidade cara aos profesionais da Atención Primaria da área viguesa, aos que trasladou o “agradecemento” pola súa “valentía” na súa defensa dunha sanidade pública de calidade.

Así o transmitiu en rolda de prensa o rexedor, horas despois de que os xefes de centros de saúde de Vigo ratificasen a súa dimisión “irrevogable” ante o “abandono” da Atención Primaria por parte do goberno galego.

Segundo proclamou Abel Caballero, estes profesionais “están a defender aos seus pacientes” mesmo por encima dos seus cargos, e dimitiron en defensa deses pacientes e dos cidadáns de Vigo. “Son un exemplo de compromiso social”, recalcou.

“Estamos moi orgullosos da súa loita, e o seu éxito será o éxito de todos os cidadáns de Vigo”, aseverou Caballero, quen, a continuación, subliñou que os traballadores “deron unha mostra enorme da súa capacidade de diálogo”. Por contra, lamentou que a Xunta non dera resposta ás súas formulacións, o que lle levou a esixir “a Feijóo” que “asuma de forma inmediata” as demandas destes profesionais.