O portavoz municipal de Marea de Vigo, Rubén Pérez, achacou o fin da prestación de servizos da aerolínea Ryanair no aeroporto de Peinador a que os destinos que ofertaba “non eran necesarios” e asegurou que o que a cidade necesita é unha conexión con Londres.
Nesta liña, o edil criticou que os destinos que unía a compañía irlandesa con Vigo “non eran os que necesitaba a cidade”, senón os que, ao seu xuízo, conviñan á empresa, segundo afirmou nunha rolda de prensa que tivo lugar este luns na urbe galega.
Así mesmo, Rubén Pérez, preguntouse cantos turistas procedentes de Milán, Edimburgo e Bolonia –os destinos internacionais que conecta Ryanair coa cidade– visitaron Vigo. Por iso, instou ao goberno local a “reorientar” a oferta, en especial nas datas nas que esta urbe recibe unha maior afluencia, como o mes de decembro.
SUBVENCIÓNS PÚBLICAS
O concelleiro de Marea de Vigo tamén reprobou que as subvencións do Concello e a Deputación de Pontevedra para que a aerolínea irlandesa operase na cidade olívica “non serviron de nada”.
Deste xeito, mostrouse contrario á concesión de axudas ás aerolíneas e valorou a estratexia do Concello de Santiago de Compostela, que, segundo incidiu, aposta por “promocionar as rutas que xa existen” e non por “crear unhas novas”, un plan oposto ao desenvolvido en Vigo.
Neste sentido, denunciou que o concurso público convocado estivese, na súa opinión, deseñado para “ser gañado por Ryanair” e apostou por crear unha conexión con Londres e “tentar restaurar a de París”, que no seu momento era operada por Air France. Ademais, reivindicou a necesidade de elaborar unha estratexia coordinada entre os aeroportos galegos.
