A Sociedade Protectora de Animais do Morrazo, en coordinación co Concello de Cangas
– Concellarías de Ensino, Medio Ambiente e Servizos Sociais –, vai desenvolver unha
Campaña de Concienciación Animal nos distintos centros educativos e sociais do
municipio.
Baixo o título “Tenencia responsable de Animais de Compañía” o persoal da Sociedade Protectora de Animais pretende trasladar ao mundo educativo (alumnado de quinto e sexto de Educación Primaria durante os meses de maio e xuño), a escala de valores de responsabilidade e respecto ao mundo animal.
Abandono e maltrato, importancia da identificación, obriga de levar os mesmos con correa, limpeza de excrementos, adopción… serán algún dos temas a tratar nas
nomeadas charlas coloquios de carácter socio-educativo-mediambiental, que estarán
acompañadas dunha presentación e vídeo sobre o tema. O alumnado asistente ás
charlas será agasallado con bolis, chapas e diplomas da propia asociación.
O ciclo de conferencias comezará esta mesma semana, o venres día 4 de maio de
2018, no local de Centro de Rehabilitación da Asociación DOA (Edificio Xoia) para
continuar de seguido cos distintos centros educativos interesados na vindeira semana.
Solicítase aos Centros Educativos e Sociais de Cangas que estean interesados, a fin de concretar data e hora, que se poñan en contacto coa Sociedade Protectora de Animais, co teléfono de contacto 697 523 385 (Lorena).
