A Policía Local de Vigo instou este venres os condutores a extremar as precaucións ante a aparición de xabarís no medio dos carrís de circulación das estradas de varias parroquias da cidade.

De feito, o pasado xoves o condutor dun turismo sufriu un accidente de circulación na rúa Clara Campoamor ao atropelar a un xabaril que atravesaba a calzada, segundo trasladou a Policía Local. O animal, supostamente ferido, logrou escapar do lugar do accidente, engadiu.

A central da Policía Local recibiu varias chamadas de condutores que se atoparon con xabarís nas últimas semanas circulando polas parroquias de Candeán e Cabral. Neste sentido, este corpo policial fai fincapé en que se extreme a precaución e se preste máis atención durante a condución, especialmente pola noite e de madrugada.