Abanca materializou o seu apoio ao sector do mar coa celebración dun encontro especializado ao que convidou os principais representantes das confrarías máis relevantes da ría de Vigo, e que serviu tamén para renovar os seus convenios financeiros.
Durante o evento, a entidade escoitou as peticións do sector e ofreceu aos profesionais da pesca solucións á súa medida, segundo reivindicou a empresa nun comunicado. A sesión de traballo tivo lugar na sede institucional do banco en Vigo e contou coa presenza do director territorial de Abanca na cidade, Walter Álvarez, e do director de Abanca Mar, Javier Fraga, entre outros.
A reunión comezou coa sinatura dos convenios de colaboración en materia financeira que o banco mantén co sector. “Uns textos que recollen os produtos e servizos máis importantes dispoñibles para o colectivo e que permiten dar resposta ás súas principais necesidades“, explicou Abanca. Neles, o crédito é o “eixe central”, e recóllense opcións tanto para as necesidades cotiás como para afrontar con garantías grandes investimentos, insiste o banco.
Despois da sinatura destes convenios, os representantes das entidades participaron nun coloquio sobre a realidade do sector e os grandes retos aos que se enfronta. Un ano máis, expuxéronse cuestións como a renovación da frota, a sucesión xeracional, o compromiso coa sustentabilidade ou o aumento dos custos.
