A Universidade de Vigo presentou este venres o último libro do profesor da Facultade de Filoloxía e Tradución Carlos Garrido, editado polo Servizo de Publicacións da institución, e que reúne 180.000 nomes de invertebrados en catro idiomas: portugués, español, inglés e alemán. “Dicionário de Zoologia e Zoonímia dos Invertebrados. Português/Espanhol/Inglês/Alemão” constitúe unha achega importante á terminoloxía zoolóxica e á tradución científico-técnica, e é a maior compilación feita ata o momento de nomes vernáculos de invertebrados en galego-portugués e español.
Na presentación do libro, o responsable do Servizo de Publicacións da UVigo, David Tizón, salientou que este volume é “un fito excepcional no mundo da Bioloxía” e “unha obra única no seu xénero”. Así mesmo, puxo en valor que a publicación é dual, xa que conta cunha versión dixital, concibida para consultas rápidas e áxiles. Carlos Garrido explicou que o libro, de case 1.400 páxinas, contén un amplo repertorio de denominacións científicas, paracientíficas e vernáculas destas especies, ademais de información sobre a súa morfoloxía, fisioloxía, embrioloxía, ecoloxía, filoxénese e sistemática.
CASE TRES DÉCADAS DE TRABALLO E TRES EDICIÓNS
Segundo detallou, trátase da terceira versión dun traballo iniciado hai case 30 anos, xa que a primeira edición se publicou en 1997, con 15.000 termos nos catro idiomas. A segunda foi publicada en 2019 pola Universidade de São Paulo, no Brasil, con 60.000 termos. Na presentación do volume participou tamén o catedrático de Zooloxía e exreitor da UVigo, Salustiano Mato, que puxo en valor o traballo do profesor Garrido e os seus coñecementos de zooloxía sistemática, terminoloxía e tradución especializada.
O autor doutorouse en Bioloxía cunha tese sobre a taxonomía da fauna ibérica dun grupo de gasterópodos terrestres e, paralelamente, é especialista en tradución e terminoloxía. Ademais, desenvolve o seu labor docente na tradución de textos científico-técnicos do inglés e do alemán ao galego e ao español. Para Salustiano Mato, este libro non só é unha ferramenta útil para os científicos, senón tamén unha “nube de datos rigorosa e trazada” e, na súa versión en papel, “unha verdadeira peza de coleccionista”.
