O PSdeG informou de que presentou este xoves unha denuncia perante a Xunta Electoral Provincial de Pontevedra contra o presidente da Xunta, Alfonso Rueda, pola visita realizada o pasado 14 de outubro ás obras de dúas promocións de vivenda pública en San Paio de Navia, en Vigo, e pola comunicación que o Goberno galego difundiu ese mesmo día na súa páxina web. Os socialistas consideran que, oito días despois de publicarse no Boletín Oficial do Estado (BOE) a convocatoria das eleccións xerais, a Xunta “utilizou un acto institucional e unha canle oficial para facer balance da súa xestión en materia de vivenda, algo que a lei electoral prohibe expresamente mentres dura o período electoral”. O escrito, asinado o 15 de outubro pola representante socialista na circunscrición de Pontevedra, fundaméntase no artigo 50.2 da Lei orgánica do réxime electoral xeral (Loreg).
Este precepto prohibe, desde a convocatoria e ata a celebración das eleccións, calquera acto organizado ou financiado, directa ou indirectamente, polos poderes públicos que conteña alusións a feitos ou logros obtidos. A denuncia sostén que o contido publicado pola Xunta vai máis alá de informar do estado duns traballos e constitúe “unha valoración favorable da xestión autonómica difundida a través dun soporte institucional”. Para os socialistas, a suma dunha visita presidencial e da súa difusión na web oficial “supón presentar como méritos da Administración autonómica pasos dados, compromisos cumpridos e proxectos cando o proceso electoral xa está en marcha”.
RETIRADA DO CONTIDO
Na denuncia, solicitan á Xunta Electoral que comprobe e deixe constancia do contido íntegro da publicación e da súa data, e que lle requira ao Goberno galego “información sobre a organización da visita e os medios públicos empregados, así como a identidade das persoas que elaboraron e autorizaron a comunicación”. Piden tamén que se declare a vulneración da normativa que prohibe os actos de inauguración de obras ou servizos públicos durante o período electoral e que se ordene o cesamento da difusión do contido mentres dure ese período. A petición incluiría a súa retirada ou desactivación temporal na web da Xunta e nas reproducións institucionais que se detecten, conservando unha copia para o expediente.
PROCEDEMENTO SANCIONADOR
Os socialistas reclaman igualmente que se lles requira aos responsables que se absteñan de repetir actuacións institucionais desta natureza e que o órgano competente valore a apertura dun procedemento sancionador, unha vez identificadas as persoas responsables e sen anticipar a súa culpabilidade nin a posible sanción. A denuncia recolle tamén a posibilidade de que a Xunta Electoral Provincial de Pontevedra remita o caso con urxencia á Xunta Electoral Central, se considera que esta é a competente pola condición da autoridade denunciada e polo alcance da difusión.
