Veciños do barrio vigués de Lavadores esixen á Xunta e ao Concello a “paralización inmediata” do Proxecto de Interese Autonómico (PIA) para o desenvolvemento residencial en Santa Cristina, que afectará unhas 50 vivendas para construír 1.454, maioritariamente protexidas. Nun comunicado, a Plataforma de Afectados criticou que esta iniciativa supón unha transformación total do barrio, ao implicar expropiacións forzosas “sen teren analizado antes as consecuencias” destas. “Moitas das persoas afectadas, algunhas de avanzada idade, xa lle trasladaron á Plataforma a súa intención de non abandonar as súas vivendas de toda a vida, das que son propietarias”, apuntaron.

Por iso, enviáronlle unha carta ao alcalde, Abel Caballero, para que “cumpra o seu compromiso” de responder ás demandas da veciñanza, recollidas no escrito. O texto, ademais de poñer de manifesto a “violencia” da fórmula elixida, lamenta o que a plataforma considera unha concentración de toda a vivenda pública de Vigo nese barrio. Isto implicará, ao seu xuízo, “a segregación da cidadanía, así como a destrución dunha comunidade que conserva as relacións e o modo de vida tradicional, rural e con actividade agraria”, sinalan.