A sección quinta da Audiencia Provincial de Pontevedra acolleu este martes o inicio dunha vista contra un home acusado dun presunto delito continuado de abuso sexual cometido sobre unha nena menor de 16 anos, filla da súa parella.

Segundo o escrito da Fiscalía, os feitos ocorreron en varios domicilios nos que conviviu a familia, entre os anos 2013 e 2020, e na xornada deste martes declarou a vítima, a porta pechada, así como tres testemuñas: a nai da menor, o pai e un fillo do acusado. A nai recoñeceu ante o tribunal que nunca presenciou os feitos denunciados pola súa filla (tocamentos, entradas do acusado no seu cuarto pola noite para masturbarse, etc.), pero que sabía que á menor “non lle caía ben” o seu marido, o acusado.

Segundo sinalou, a denuncia presentouse despois dunha discusión, xa que a nai atopou un diario da súa filla, no que insinuaba que pasara algo co acusado. “Eu non poño en dúbida que pasou algo, creo que si; o que non sei é a intensidade, ata onde chegou“, apuntou.

Mentres, tanto o pai como o fillo do acusado incidieron en que nunca viron comportamentos estraños na relación entre o acusado e a nena, aínda que sinalaron que o trato que o procesado lle daba era distinto ao que tiña co resto dos seus fillos, cos que “non era tan esixente”. Estas dúas testemuñas apuntaron que a vítima non aceptaba que a súa nai casara co acusado, e que mesmo chegou a verbalizar que ía “acabar co matrimonio”.

O acusado declarará ao final do xuízo, e o tribunal fixou este xoves como data para continuar a vista. A Fiscalía pide que sexa condenado a 6 anos de cadea e que se lle impoña a inhabilitación para o exercicio de calquera profesión, oficio ou actividade, sexan ou non retribuídos, que impliquen contacto regular e directo con menores de idade durante 9 anos, así como a medida de liberdade vixiada durante 5 anos. No relativo á responsabilidade civil, a fiscal pide que o procesado indemnice a vítima con 10.000 euros polos danos morais.